انتبه من فضلك ، الثورة ترجع إلى الخلف

ده رأيي الشخصي في اللي بيحصل وكل اللي باطلبه من سيادتك إنك تقرأه للنهاية وتفكر فيه بعقللك قبل ما تقدم على أي فعل ، حتى لو لاقيتني مختلف معاك في الرأي ، اشتري مني وخدني على قد عقلي

(1)

امبارح الجرايد نشرت خبر إن مبارك هايلقي خطاب يعرض فيه إنه يتنازل عن ثروته مقابل إننا نعفو عنه  وقال ايه  فيه واحد "من كبار الصحفيين" بيعكف على كتابة الخطاب وإنه من المتوقع يكون خطاب عاطفي زي خطابه التاني اللي سبق موقعة الجحش

الكلام اللي فات كلام "مصدر مطلع رفض ذكر اسمه"

وماله مفيش مشاكل أهو خبر بردو ينفع يتنشر

مش كده وبس

قالك برضه إن فيه "مصدر مطلع" داخل القوات المسلحة بيقول إن المجلس العسكري بيتعرض لضغوط من "جهات كثيرة بعضها مصري وبعضها عربي" بتسعى لاتمام هذا الأمر

مش بس كده

قالك إن "مصدر خليجي رسمي" واعتقد إنه مطلع برضه قال مينفعش كده يا رجالة تحبسوا الريس خلونا نسوي الأمر ونظبط التظابيط ونفيش الهوامش

مش كده وبسسسسس

قالك إن "مصادرنا" بتؤكد إن مبارك وزوجته في حالة نفسية سيئة وقاعدين يندبوا حظهم .. هو يقول مكنش يومك يا حسني .. وهي تقول يا شماتة أبلة ظاظا فيا !!

(2)

خبر حلو والله ، لو أنا شغال صحفي مش هياخد في ايدي ربع ساعة عشان اعمل واحد زيه

والوصفة سهلة .. تجيب شوية إشاعات وتحطهم جنب بعض .. وتكتر شوية من المصادر المطلعة اللي بترفض ذكر اسمها .. والجهات المصرية والعربية .. وتوزع المصادر المطلعة ع المستشفى والمجلس العسكري والخليج

وهووووب بقى خبر يستحق إن الشروق تنشره على صفحتها الأولى مع مانشيت عريض يقولك "مبارك يطلب العفو"

طب يا عم الحج أصدقك إزاي وأنت أصلا كل كلامك عن مصادر مطلعة رافضه ذكر اسمها ؟

ونفترض إن الكلام مظبوط .. المجلس العسكري طلع بيان نفى فيه وجود أي ضغوط تخص محاكمة مبارك وإن ده شأن داخلي محدش له إنه يتدخل فيه .. ونفي إن فيه اتجاه للعفو عنه

نيجي للسؤال الأهم هل ده خبر يستحق يتنشر ع الصفحة الأولى كخبر رئيسي ؟؟

(3)

مفيش دقايق من نزول الخبر إلا ولاقينا الإخوة المناضلين على تويتر وفيس بوك شغالين تسخين وشتايم بأقبح الألفاظ اللي ممكن تسمعها

ومرة على مبارك .. ومره ع المجلس .. ومرة ع النائب العام

ورغم بيان الجيش اللي نفى حوار العفو لاقينا الصفحات اتعملت .. والايفنتات اتكريتت ..  وهووووب بقى فيه جمعة رفض الاعتذار عمل عليها attend حوالي 10000 شخص

تيجي تقولهم يا اخواننا هو اعتذر أصلا ؟؟؟

يبقى لسان حالهم بيقول : احنا لسه هانستناه لما يعتذر !! أهو ده اللي كان ناقص !! احنا نرفض الأول بعدين هو يعتذر براحته !!!

(4)

الموضوع موقفش عند كده بس

ده احنا لاقينا تحقيقات صحفية وبرامج توك شو بالهبل اختصت بس بموضوع الاعتذار اللي في علم الغيب ده .. ويقولك حالة من الاستياء والرفض شهدتها شبكات التواصل الاجتماعي .. ويقولك القوى السياسية زي الجمعية الوطنية للتغيير وحزب الكرامة وحزب التحالف الشعبي الاشتراكي رافضين الاعتذار.. ويقولك بقى إن العفو ده محتاج قرار من المجلس العسكري بعد ما يتم عليه الاستفتاء من الشعب وده كان كلام القضاة ..

حتى رسامين الكاريكاتير ماصدقوا واشتغلوا ع الخبر

جمييييل خااااالص

سبنا اللي ورانا واللي قدامنا وفضينا احنا نتكلم في أدق تفاصيل خبر لسه محصلش أصلا وكل معلوماتنا عنه من "مصادر مطلعة"

كل المشاكل الإقتصادية والأمنية انتهينا منها وفاضل بس اعتذار سيادته .. محتاجين نعرف عنه كل حاجة .. ونفتح كل دقيقة مكلمة عنه .. وننزله التحرير مخصوص !!

(5)

نرجع تاني لجمعة رفض الاعتذار واللي قالك دي هاتبقى ثورة تصحيح 

لما كتبت ع الفيس اسأل عنها جاوبني أحد الأصدقاء بإنه هاينزل التحرير بالذات عشان قرار الافراج عن زكريا عزمي ، وكان ردي عليه كالآتي :

دلوقتي زكريا عزمي خد إفراج "على ذمة التحقيقات" يعني "لسه بيتحقق معاه"
يعني "مخدش براءة"
حتى بفرض إنه بعد التحقيقات معاه هو أو مع غيره حتى مبارك .. خد براءة
اللي اداله البراءة ده هو القضاء... صح ؟
اللي هو احنا واثقين في نزاهته وإنه مش هايعمل كده إلا لو فعلا الأدلة لا تكفي لإدانته
احنا بقى عايزين نعمل ايه ؟؟
ننفذ القانون بايدينا ؟ وننصب نفسنا قضاة على الناس ؟؟؟؟
اهو ده أخطر على مصر من النظام السابق
احنا عملنا الثورة عشان دولة الكل فيها بيحترم القانون
لكن الخطوة دي بتتعدى علي مبدأ سيادة القانون
ده غير إنها هاتفتح علينا أبواب شرور كتيرة احنا في غنى عنها
كفاية إن كل واحد ثقته في القضاء هاتتهز وهايبقى عايز ياخد حقه بدراعه
وده طبعا مش محتاج اقولك ممكن يودينا لايه !!

(6)

برضه الموضوع موقفش لغاية هنا 

من ضمن الناس اللي بتدعو لـ"ثورة التصحيح" بيقولوا احنا بنطالب بمجلس رئاسي مدني وتأجيل الانتخابات على ما الأحزاب تنزل للشارع ونعمل دستور جديد الأول ويا إما كده يا إما هايقاطعوا الانتخابات !!!

نعم يا أخويا ؟؟؟ باقولك ايه كده فووق وصحصح للي بتقوله

هو الاستفتاء بتاع 19 مارس ده كان علي ايه بالظبط ؟؟

تعديلات دستورية - انتخابات - دستور جديد ..

صح كده ؟ اسم الله عليك .. شاطر

قولي بقا كام واحد وافق ع الكلام ده ؟؟

77% من اجمالي اللي صوتوا

قولي بقا كده ايه تعريف الديمقراطية ؟؟

هي حكم الغالبية العظمى من الشعب

بـــس خلاااااص خلصت

الشعب عايز كده مش هاتيجي أنت تفرض رأيك عليه .. عايز تقاطع يا حبيبي براحتك .. بس أحب اقوولك إنك خايف من الديمقراطية  لإنها لو اتطبقت مش هاتجيبك .. أصل احنا بعيد عنك شعب جاهل مشعارف إن مصلحته مع سيادتك ومع حزبك اللي بقاله 3 شهور يا حبة عيني مش قادر يسيب اجتماعات الفورسيزون وينزل للناس في الشارع يوعيهم ويفهمهم إنه كفاءة وميه ميه

بطل استعباط ومحاولات فرض الوصاية بتاعتك دي وسيب الشعب يختار ويتحمل نتيجة اختياره 

(7)

عارف إني طولت عليكم بس معلش الموضوع نفسه طويل وعايز كلام كتير .. باختصار كده وبالعربي الفصيح : 

تحروا الدقة في الأخبار قبل نشرها ... ضعوا الأمور في نصابها الصحيح ... حكموا عقولكم لا عواطفكم ... وجهوا طاقاتكم وأوقاتكم للقضايا الرئيسية ولا تبددوها في صغائر الأمور ... لا تنصبوا أنفسكم قضاة على البشر ولا وكلاء عن إرادة الملايين .. وانتبهوا جيدا فالثورة ترجع إلى الخلف !

---