مما جنته عليّ أفكاري

من دفتر يومياتي

الاتنين 30/05/2011

* النهاردة كان آخر يوم في الدراسة وكنا عاملين حفلتين واحدة لأسرة Contact والتانية بتاعة اتحاد الطلبة

* يوم من أجمل الأيام اللي عدت عليا في الـ 5 سنين كلهم

* الأسرة دي زي العسل أصلاً وكل الأعضاء اللي فيها دماغهم حلوة أوي وعاااالية :)

* كان فيه مسابقة معلومات عامة والجوايز كان شكلها فخم وهي ملفوفة في ورق السلوفان وكانت مفاجأة جامدة جداااا لما الناس فتحت الجوايز بعد ما المسابقة خلصت ولاقوها .. اللي علبة تونة .. واللي كيس ملح .. واللي طلعله علبة مرقة دجاج ماجي =)) .. ولما فتح العلبة لقى اللي جواها باكو شاي هههههههههههه ... فعلااا ممكن بـ 20 جنيه تعمل مسابقة وجوايز وتخلى 20 واحد يتقلبوا على ضهرهم م الضحك =))

* عملنا دايرة المحبة ودي لعبة كنت اتعلمتها في معسكر في اسكندرية .. نقف كلنا على هيئة دايرة وتبدأ من عند واحد يكون معاه قلم مثلاً ويقول أنا هاهدي القلم ده لفلان عشان كذا كذا .. بحيث إن كذا كذا دي صفة حلوة فيه أو حاجة اتعلمها منه أو حتى نصيحة يقولهاله .. والمفروض القلم مايروحش لحد مرتين لغاية مايرجع للشخص اللي بدأت من عنده اللعبة

* اللعبة بسيطة خالص .. بس بتطلع كمية مشاعر رهيبة :)

* ع الرغم من محاولاتي المستمرة للخروج من شرنقة العزلة والانطوائية المتأصلين في طبعي بس بردو النهاردة اتلخبطت ومعرفتش اتكلم وفشلت إني اعبر عن مشاعري ناحية كل واحد موجود 

* كذلك بردو لما حد بيقول كلمة حلوة في حقي باضرب لخمة $:

* كان فيه واحد صاحبي بيقولي " أنت خجول أوي ودي حاجة نادرة " فباقوله " لا ياعم مش للدرجة يعني " قالي " بجد مش باهزر " وعاد كلامه تاني وزود عليه كام كلمة كده وقالي ممكن أتحداك إني في خلال دقيقتين أخلي وشك يحمر .. بصراحة مقدرتش اتحداه عشان ساعتها ... احم احم $:

* واضح كده إن الإنسان سجين طبعه على رأي عمنا عبد الوهاب مطاوع .. عموما أهو هاجرب طريقة جديدة وابدأ الأول اكتب من ورا الشاشة .. وإياك حد يتريق بقى ولا يعمل حاجة !!

* المهم كنت عايز اقول إن ربنا لما بياخد من الإنسان حاجة بيحبها أوي بيعوضه عنها بحاجات أحسن له بكتير .. بس بتركيزه على اللى فقده مبيحسش باللي كسبه ومبيفهمش الحكمة من المنع والعطاء .. مع إنه لو فهم هايرتاح ! 

* عايز امسح اللي كتبته ده بس بالعند فيا هاسيبه كده P:

* طب تعرفوا .. أنا ساعات بافرح أوي لما افكر والاقي إني اعرف ناس حاسس إن ربنا راضي عنهم .. إحساس جميل لما تتخيل إن اللي أنت بتكلمه ده من أهل الجنة :)

* صحيح كنت هانسى !! .. قصة "أحمر .. أصفر .. أخضر" اتنشرت في المجموعة القصصية "عتبة الباب" ... كتاب إلكتروني مشارك فيه عدد من الشباب .. فكرة وإعداد سارة درويش

   >> لتحميل الكتاب

* الشئ بالشئ يذكر بقى .. مقال "هبوط ثوري" خد جايزة اتحاد الطلاب كأفضل مقال سياسي .. الجايزة شهادة تقدير ومبلغ مالي قيمته 100 جنيه (لسه مشوفتش منهم حاجة بلاش نق) ^_^

* ساعات باحس إني لو مت دلوقت مش هابقى زعلان لأني واخد حقي تالت ومتلت .. ده بالنسبة لحقي أما واجبي فــ .. امممم .. مشعارف بجد بس بتخوفني أوي الآية دي " الذين ضل سعيهم في الحياة الدنيا وهم يحسبون أنهم يحسنون صنعا " .. بس بردو عندي أمل كبير في الرحيم الودود الرحمن :)

* غداً في الموقِفِ المشهودِ

أَلقَى الواحدَ

الغفّارْ
 
وأسألُهُ بِدَمْعِ القلبِ

زينةَ خَلْقِهِ الأبرارْ

بحقِّ الحبِّ

هل يُلقِي

الحبيبُ

مُحِبَّهُ

في النارْ؟!! (1)

* ساعات تانية بقى لما افكر بالاقي إني آي نعم واخد حقي تالت ومتلت بس باحس إني ناقصني حاجة كده .. أو طمعان كمان في حاجة كده عشان يبقى رابع ومربع بس :) .. ربِ لا تذرني فــرداً :) 

* الصبر مفتاح .. D:


* اللهم طولك يا روح شكلي هامسحه بجد @:


* خلاص كفاااااية كده .. آدي آخرة العنـد S:


-----------------------------
(1) أحمد بخيت - الليالي الأربع

---