رسالة من مواطن جاهل

للناس اللي عايزة تأجيل انتخابات أو دستور الأول أو مجلس رئاسي مدني أو بمعنى أصح رفض نتيجة الاستفتاء

عاوز منكم شوية اجابات

1- بفرض ان الاستفتاء ده كان للمادة التانية ولا كذبة واحنا صدقناها .. تفتكروا لو اتعمل بكره استفتاء على مطالبكم دي هايتوافق عليها ولا هاتترفض ؟

2- طب نفترض إننا شعب جاهل ومش فاهم مصلحته ومحتاج توعية وتثقيف قولولي ايه الحل عشان نوعي الشعب ده .. وايه هي المجهودات اللي حصلت  في مجال التوعية خلال ال 4 شهور اللي فاتوا ؟ .. ايه الخطط والبرامج اللي اتناقشت في الموضوع ده ؟ ... ماهو عدد اللقاءات والمؤتمرات اللي عقدت بهدف الوصول للحل ؟ ( حل مشكلة الجهل مش الدولة المدنية والدينية ومعرفش ايه ) .. كم عدد القرى والنجوع والكفور والعزب الللي نزل فيها ناس مثقفين عشان يوعوا الناس البسطاء ؟

3- هل يوجد طريقة لتطبيق الديمقراطية إلا الديمقراطية ؟؟؟ إن الناس تختار ويطلع اختيارها غلط وتتحمل نتيجته فتتعلم في المرة الجديدة تختار صح ؟؟ ولا هو نقول مش مستعدين للديمقراطية والشعب جاهل واحنا شايفين الصح في كذا ... أصل لو متعرفوش ده كان نفس كلام النظام اللي عملنا ثورة لاسقاطه !!

4- الديمقراطية هي حكم الغالبية العظمى من الشعب .. سواء كانت الغالبية دي فاهمة أو متخلفة أو مبتفكرش .. المهم إنها غالبية الشعب وبس مش غالبية الشعب الواعي .. ولو حضراتكم شايفين إن الغالبية من الشعب عالة على المجتمع ولا تمثل الديمقراطية فياريت تقولولنا إزاي نستبدل الشعب المتخلف العالة النكرة ده ازاي ونجيب بداله شعب كيووت وأمور وبيفهم  كل حاجة ؟؟؟ 

5- هاتختاروا مين يعدل الدستور ومين في المجلس الرئاسي ؟ بالانتخابات ؟؟ بس احنا شعب جاهل مش مستعدين للانتخابات وبنمشي ورا اللي يقولولنا حلال وحرام !! نعمل ايه ؟؟ بالتعيين ؟؟ مين اللي يختارهم ؟ الجيش ؟؟ طب ازاي واحنا مش واثقين في قرارته السياسية ومعترضين على أدائه في الحكم بدليل إننا عايزين نستبدله بمجلس مدني !!!

6- ايه هي المعايير اللي هانقيس عليها وعي الشعب ؟ .. يعني هانأجل الانتخابات لغاية ما ايه يحصل ؟؟ المقاييس المادية اللي هاحدد بيها مدة التأجيل ايه هي ؟؟ ولا نأجل شوية ونقولكم خلاويص ؟ .. لسه .. خلاويص ؟ .. لسه ... !!!

 

أخيراً : انظر كم مرة يجهد "النخبة" أنفسهم في الحديث عن جهل الشعب المصري في كل محفل وبأكثر من طريقة ثم ابحث عما يفعلونه وكم من الوقت والمناقشات يبذلون بهدف توعيته وتثقيفه وأنت تعرف أين المشكلة !

---