البتـــاعة

كيدزانيا

ملحوظة : البوست ده كنت كاتبه من رمضان اللى فات بس كنت نشرته في بعض المنتديات ولم انشره في المدونة الا الان فقط

كيدزانيا كانت عنوان حلقة النهاردة من البرنامج المتميز جدا ( خواطر 5 - أحمد الشقيري )

كيدزانيا كلمة يابانية الاصل معناها مدينة الاطفال

كيدزانيا هي المدينة التي يقوم فيها الاطفال بأعمال الكبار

لو معاك طفلك وعايز ترفه عنه وفي نفس الوقت تخليه يستفاد كويس خده وروح كيدزانيا

اول ما هتدخل هتلاقي زي مطار استقبال كأنك رايح دولة كيدزانيا بتقطع تذاكر دخول والطفل بياخد معاه عملة كيدزانيا وهي كيدزوز

بيكون معاه ع الاقل 50 كيدزوز

ندخل ع المدينة من جوه

الاطفال هناك زي ما قلت بيقوموا باعمل الكبار يعني يشتغلوا في المطافي وشبكة الكهربا والاسعاف والجراحه والمطافي والتليفزيون والمطبخ وحتي في وسائل الاعلام

يعني مثلا الطفل اللى بينضم لشبكة الكهرباء ياخدوه ويروحوا يصلحوا الكهربا في احدي المناطق ويعلموهم ازاي يصلحوها

يكون فيه حريق في المدينة الاطفال بتوع المطافي يطلعوا بالعربية ويروحوا يطفوها ويعلموهم ازاي ده بيحصل في الحقيقة

حتي الاطفال الجراحين بيشوفوا عملية بتحصل أدامهم وبيشاركوا فيها كمان ونفس المعدات اللى موجوده في المستشفيات واللى بيتدرب عليها الاطباء حديثي التخرج موجوده للاطفال في كيدزانيا

وبعد نص ساعة هتلاقي اطفال ف استوديو الاخبار بينقلوا خبر الحريق وازاي المطافي وصلت في الميعاد وانقذت الموقف

مش كده وبس دول كمان بيدخلوهم البنوك عشان يفتحولهم حساب ويحطوا فيه الاجور اللى خدوها من شغلهم ويروحوا للحلاق والمطاعم ويشتروا من هناك

بالاضافة للاطفال بتوع الاسعاف لما بيروحوا يعملوا اسعافات اولية وتنفس صناعي للمريض

وطبعا ضيفوا على كده الناس اللي بتشتغل في المطاعم وصالونات الحلاقة ومحلات العصير ... الخ

بس كده

انا كنت باتفرج ع الحلقة ويعتريني شعور بالاذبهلال

احنا عندنا الاطفال بيلعبوا بلي وكونكر وسيلك روود وبنك الحظ ولما بنسيبهم يندمجوا في الحياة بيلعبوا في الطين

تخيلوا لما طفل من صغره بيروح كيدزانيا وبيجرب شغلانة جديدة كل مرة

لما هايكبر وعايز يدخل جامعة يا تري هايحتار ويسيبها زي ما تيجي ؟؟

الكلية اللى التنسيق هايختارهاله ؟؟

واحنا كشعب مصر اكتر من 90 % من الطلبة عايزين يدخلوا طب وهندسة عشان هم دول احسن الكليات !!!!

فين الاستثمارات بتاعة المليونيرات والمليارديرات العرب من حاجة زي دي ؟؟

ووالله هايحقق لهم مكسب مادي كبير جدا بالاضافة لافادة كبيرة جدا لمجتمعه ولاطفال بلده

اليابان يا جماعة مش من بين يوم وليلة أصبحت قوة عالمية

اليابان اتعرضت لتدمير كامل في الحرب العالمية التانية وبدأت من أول وجديد عشان تصبح واحدة من أقوي الحضارات الموجوده على ظهر الارض دلوقتي واللى فرضت على الكل احترامها

ليه منعملش زيهم ؟ ع الاقل يكون عندنا خطة ماشيين عليها ونشارك فيها مع حكومتنا ونبأي ايد واحدة وشعب واحد بيجمعه هدف واحد واضح للجميع

الكلام كتير بس الاكيد انه لا يأس مع الحياة
ولا حيــاة لمن تنادي

وكل عام وأنتم بخ.. !!

سلام

قصة واقعية .. للأسف

ذهبت إليه في البداية ولم أكن أعرف أنه كفيف البصر ، أبلغوني في الجمعية أن هناك شخص ما يحضر رسالة الدكتوراة ويحتاج متطوعين معه للبحث في الكتب واستخراج المعلومات وتنسيقها وما إلى ذلك ، وقد رحبت بالفكرة خاصة أنني في أجازة صيفية وهي فرصة للاحتكاك بالرسائل العلمية والأبحاث والباحثين

ما أثار دهشتي أكثر - بعد معرفتي باعاقته - هو الطموح الذي يتمتع به على الرغم من أنه تجاوز الخمسين من عمره ويحاول بكل جهده الحصول على هذه الدرجة العلمية ليثبت لنفسه أن الاعاقة لم تكن لتقف في طريق النجاح ، لم يثنيه عن عزمه تعسف الأستاتذة المشرفين على الرسالة طيلة العشرين عاما ، هؤلاء الأساتذة الذين عندما قابلتهم أحسست بقسوة قلوبهم وجفاءهم لهذا الرجل الذي لم يكن يوما حقدا على أحد أو بغضا لأحد

كل ما أراده هو نيل درجة علمية وكان يسعى حثيثا للحصول عليها ، فلم يأل جهدا في السفر إلى مختلف الجامعات والمكتبات ومعارض الكتب للبحث عن كل جديد فيما يتعلق بمجال بحثه
لم يدفعني على الاستمرار معه إلا حبه واخلاصه لرسالته في الحياة
في بيت صغير كنا نجلس سويا نستخرج المعلومات من بطون الكتب
نسهر كثيرا وأحيانا لا ننام أبدا لانهاء جزئية بدأنا فيها

دائما ما كانت تحمسني كلماته بل إن صداها لا يزال يتردد في أذني حتي الآن وهو يقول لي " أنا حاسس إنك هاتبقي وزير البترول في يوم من الأيام " فكنت أضحك بشدة وأنا أريد أن اقول له " خلى الطابق مستور أحسن " ولكني لم اقدر أن أقول هذه الكلمات اليائسة لرجل عاش على الأمل طيلة حياته فكنت أكتمها في نفسي واكتفي بقول " ربنا يسهل يا دكتور "

وبعد أكثر من عام ونصف من العمل معه أوشكنا على انهاء الجزء النظري في الدراسة ولم يتبق لنا إلا الدراسة الميدانية
ولكن لكي يتسنى لنا أن نبدأ في عمل استمارة الاستبيان والبدء في الدراسة الميدانية لابد من موافقة الأستاذ المشرف على الرسالة على الجزء النظري

أما عن هذا الاستاذ فحدث ولا حرج فبعد أخذه للرسالة ليقرأها ويقرر ما إذا كان الجزء النظري اكتمل أم أن هناك تعديلات ، غاب طويلا مرددا دائما أنه مازال يقرأها ويتطلع عليها ، حتى إذا ما أوشك على النهاية أسلمها لغيره لأنه سيسافر خارج البلاد وهكذا ظل الموقف غير واضح المعالم

كنت ألاحظ ذلك وكان احساسي يخبرني أنه " مفيش فايدة " ولكني لم أكن لأصيب حماس هذا الرجل الطيب بجرعات من اليأس وخيبة الأمل
عندما جلست مع الأستاذ رئيس القسم بالكلية قال لي " عارف يا أحمد لو أنا المشرف ع الرسالة دي كنت خليته يناقش من بكره "

كم كنت انتظر أن يجئ يوم المناقشة ليكلل هذا الجهد والتعب بفرحة النجاح
بل كم كان ينتظر هو مجئ هذا اليوم على أحر من الجمر !! كان حلمه الذي لم يفارقه لا في نومه ولا يقظته

وكم كان من الصعب عليّ أن أأخذ أوراقه وكتبه - التي كنت احتفظ بها عندي في انتظار اشارة البدء في الجزء الميداني - وأذهب إلي بيته لأسلم الأمانة إلى أهله وأعزيهم في وفاته
وكم كان من الصعب عليهم أن يأخذوا تلك الأوراق وهي كل ما تبقي من رجل عاش حياته للعلم ومات في سبيله ، كفيف البصر لكنه سار في طريقه بخطا ثابته متبصرة ، مثالا يحتذى في الكرم والسماحة وحسن الخلق وطيب القلب

رحمة الله عليك أستاذي
كم من كفيف أنار طريق مبصر

هكذا علمتني الحياة

أخذت أقلب في أوراقي المبعثرة فوجدت من بينها هذه القصاصات التي كتبتها من فترة كبيرة إلى حد ما فأحببت أن أشارككم بها ولأذكر نفسي بما كتبته فيها

* على الرغم من إني محققتش انجاز يذكر في أحد المجالات .. وإن أغلب الحاجات اللى باعملها مالهاش علاقة
ببعض .. لكن لازالت عندي القناعة إن أكيد هاييجي اليوم اللى هلاقيهم بيتربطوا ببعض لخدمة الأهداف الرئيسية .. إزاي ؟؟ معرفش ..لكن أنا متأكد من كده ...

من جاءني يمشي أتيته هرولة !!!

* مدمن النت ميفرقش كتير عن مدمن المخدرات .. كله إدمان .. سببه إن ما زاد عن حده انقلب إلي ضده .. ودا لأني تقريبا حولت حياتي
لداخل النت .. أو يمكن لاقيت حياتي الافتراضية جواه أحسن من بره .. وجايز بردو لأني لاقيت فيه كافة طرق اشباع رغباتي ... لما احتاج اقرأ كتاب ، انزله من النت واقراه .. خبر جديد ، اجيبه من ع النت .. عندي رغبة في الكتابة والمناقشات والتعبير عن الرأي ، المنتديات موجوده .. لما باحتاج اتعرف على ناس جديدة ، المنتديات مليانه ... محتاج افرغ رغبة في تعلم أشياء جديدة ، اختار برنامج أو لغة برمجة واقرأ فيها واطبق عليها .. للأسباب دي ولغيرها ممكن بكل بساطة وبدون وعي أن يتحول النت إلى إدمان وهو ما حدث معي .. وما زلت باحاول اتعالج من الادمان ده

* إذا لم تكن تسير في مخططك .. فأنت تسير في مخططات الآخرين
ودا أهم الدواعي اللى تخلينا نحتاج وقفة مع النفس كل فترة .. لأني النهاردة حددت هدفي وعرفت الطريق الى هامشي فيه .. بكره هانحرف بمقدار خطوة واحدة بس .. أكيد مش هلاحظها لأنها صغيرة .. وبعده هانحرف كمان خطوة وبالتأكيد بردو مش هلاحظها .. وهكذا دواليك لغاية م الاقي نفسي ماشي في طريق تاني خالص .. دنيا تانية مش اللى كنت باحلم بيها ومخطط لها .. لو ما فوقتش بدري ممكن أتوه ومعرفش ارجع للطريق الرئيسي إلا بعد جهد وعناء كبير .. ممكن أوفرهم على نفسي لو وقفت مع نفسي كل فترة وراجعت حساباتي ...

لا تتبعوا خطوات الشيطان

* طالما إحنا لسا عايشين وبنتنفس يبأي أكيد فيه حاجة لازم نعملها .. لأن لو كانت مهمتنا خلصت كان زماننا موتي دلوقتي .. لكن طالما الحياة لسا بتدب فينا يبأي لسا المهمة ماخلصتش

* أي نجاح في الدنيا يتطلب إن الواحد يتخلي عن أهدافه أو مبادءه أو دينه ما هو إلا قمة الفشل

* أحيانا نصاحب من هم أقل مننا بهدف إننا ناخد بأيديهم لكن يحصل العكس ويجرجرونا هما لتحت ..

ومن قارب الفتنة وقع فيها

* لو نفسك تقرأ عدد كتب في وقت قياسي .. اقرأ كل يوم صفحة
ولو نفسك تبأي شاعر .. اقرا كل يوم بيتين .. واكتب كل شهر بيت
ولو عاوز تسرع من كتابتك ع الكمبيوتر .. اكتب كل يوم كلمة......

وخليك متأكد دايما .. إن خير الأعمال ، أدومها ... ولو قلت

* ناس كتير ماتوا في ريعان الشباب عملوا اللى ماعملهوش المعمرين فوق ال100 سنة .. على الرغم من إن يومهم كان 24 ساعة بردو .. زينا يعني .. لكن السبب كلنا عارفينه كويس

* الأفعال صوتها أعلى دائما من الكلمات ..

هكذا علمتني الحياة ..